ប្រែសម្រួល៖ រតនា
បាងកក៖ កាលពីថ្ងៃចន្ទ ១៨ ធ្នូ ក្រុមមន្ត្រីយោធាថៃបាននិយាយថាយោធាថៃបានសម្លាប់អ្នករត់ពន្ធគ្រឿងញៀនចំនួន ១៥ នាក់ នៅក្នុងការបាញ់តដៃគ្នាមួយនៅក្នុងស្រុកដាច់ស្រយាលមួយកន្លែងនៃភាគខាងជើងប្រទេសក្បែរព្រំដែនប្រទេសមីយ៉ាន់ម៉ា។
ការប៉ះទង្គិចដោយមានការបាញ់តដៃគ្នាទៅវិញទោមកកាលពីល្ងាចថ្ងៃសៅរ៍បានកើតឡើងនៅក្នុងស្រុក Mae Fah Luang ខេត្ត Chiang Rai ជិតតំបន់ត្រីកោណមាស ដែលជាតំបន់ច្រមុះជ្រូករវាងប្រទេសថៃ មីយ៉ាន់ម៉ា និងឡាវដែលជាប្រភពរត់ពន្ធគ្រឿងញៀនដ៏ធំបំផុតក្នុងតំបន់អាស៊ី។
មន្ត្រីយោធាថៃបានប្រាប់ AFP ថា បន្ទាប់ពីមានការប៉ះទង្គិចគ្នា ទាហានថៃបានរកឃើញកាបូបចំនួន ១៧ ដែលមានថ្នាំអំហ្វេតាមីនជាង ២ លានគ្រាប់។
លោកបាននិយាយក្នុងលក្ខខណ្ឌមិនបញ្ចេញឈ្មោះថាយើងមិនទាន់អាចកំណត់អត្តសញ្ញាណឧក្រិតដ្ឋជនបានទេថាតើអ្នកទាំង ១៥នាក់នោះសុទ្ធតែជាជនជាតិថៃឬក៏មិនមែន។
ប្រទេសមីយ៉ាន់ម៉ា គឺជាប្រភពផលិតថ្នាំអំហ្វេតាមីនខុសច្បាប់ដ៏ធំមួយ ដែលភាគច្រើនត្រូវបានដឹកជញ្ជូនកាត់តាមប្រទេសថៃ និងឡាវ។
ប្រទេសមីយ៉ាន់ម៉ាបានស្ថិតក្នុងភាពច្របូកច្របល់ធ្វើឲ្យសេដ្ឋកិច្ចធ្លាក់ចុះចាប់តាំងពីរដ្ឋប្រហារយោធាក្នុងខែកុម្ភៈ ឆ្នាំ ២០២១ ប៉ុន្តែការផលិតថ្នាំសំយោគនៅក្នុងរដ្ឋ Shan កំពុងរីកដុះដាលរួចទៅហើយនៅមុនពេលមានរដ្ឋប្រហារ។
ការប្រយុទ្ធគ្នាដ៏សាហាវរវាងទាហានល្បាត និងពួករត់ពន្ធគ្រឿងញៀន មិនមែនជារឿងចម្លែកនោះទេ នៅតាមតំបន់ព្រៃភ្នំ តាមបណ្តោយព្រំដែនភាគខាងជើងប្រទេសថៃ ជាប់និងប្រទេសមីយ៉ាន់ម៉ា។
អ្នករត់ពន្ធម្នាក់ និងមន្ត្រីប៉ូលិសម្នាក់ត្រូវបានសម្លាប់នៅក្នុងការប៉ះទង្គិចគ្នាក្នុងខែកញ្ញាកន្លងមក ខណៈដែលកាលពីមួយឆ្នាំមុនមានជនសង្ស័យចំនួន ១៥ នាក់ត្រូវបានបាញ់សម្លាប់ដោយយោធាថៃនៅឈៀងរ៉ៃ ខណៈដែលពួកគេព្យាយាមឆ្លងកាត់ព្រំដែន៕
ប្រភព៖ AFP/nh